每逢過年過節，總係有大量雞呀、燒肉呀、燒鵝呀，食都食到怕，隔咗夜又唔好食，而且全部都係肉真係唔多健康。唔想浪費，兼想好味指數同健康指數直線上升，可以試吓配啲蔬菜煮個靚餸，實行活化哩啲無人問津嘅食材。今次將阿媽拜完神嗰斤燒肉炆咗南瓜火腩煲，香噴噴熱辣辣，一個餸兩個人食差不多吃光光，真係正！
材料：
燒肉 一斤
洋葱 一個
南瓜 約1/4個
磨豉醬 一湯匙
薑、蒜頭、乾葱頭各數片
葱、蒜、芫茜、唐芹各一條隨喜好加入
做法：
1. 燒肉原條起骨，肉切件。
2. 洋葱及南瓜洗淨切件。
3. 大火燒紅砂煲，加入少許油爆香薑、蒜頭及乾葱，再加入洋葱炒香。
4. 加入南瓜略炒，再加入燒肉炒勻。
5. 備一碗熱水，加入一大湯匙磨豉醬攪勻，注入砂煲內，蓋好收至中火，炆10分鐘，間中攪拌。
6. 隨喜好加入葱、蒜、芫茜或唐芹，蓋上熄火，焗3分鐘，可原煲上桌。
P.S. 由於燒肉已經有味，炆嘅時候南瓜會吸晒啲肉味同磨豉汁，夠晒味唔須要再加其他調味料。鍾意香口可多放乾葱。
