去水腫美白薏米桂圓茶

前陣子天氣潮濕悶熱，加上Zaza勁忙兼夜睡早起，搞到個人好攰，塊面勁水腫，脷腫同兩邊好深牙齒印，中醫角度代表個人好”濕”，即係淋巴系統唔暢通，循環唔好新陳代謝慢，令水份同毒素積聚喺身體入面唔能夠排出。於是Zaza就連續幾晚煲薏米水飲，三四日後就好番好多喇！面上的浮腫退咗，個人都精神番。

做法好簡單，又好飲，可以當糖水，薏米有效利尿去水腫，仲可以美白皮膚，桂圓補血安神又養顏，蜜棗補氣活血，實在係女仕恩物啊！

材料：

生薏米　（細粒）

熟薏米　（大粒）

蜜棗

桂圓　（龍眼肉）

冰糖

（份量多少冇所謂，生熟薏米比例各一半，如圖中份量約可煲成2-3杯，如果體質屬寒底或冬天時飲用可加一片薑。）

做法：

1. 生、熟薏米沖洗後用水浸泡1-2小時。

2. 蜜棗及桂圓沖洗乾淨。

3. 煮滾6碗水，加入生、熟薏米、蜜棗及桂圓，用中火煲約1小時至薏米煲焾。

4. 如喜歡甜的可加入一小塊冰糖，否則不加也略帶微甜。冰糖全溶化後攪勻即可。