節瓜粉絲蝦煲

睇番舊文，先發覺我冇post過啲家常小菜出嚟，之前工人喺度嗰陣都係佢煮飯，雖然煮得唔好食，但為咗唔同佢爭嘢做我都係尤得佢煮，所以甚少有煮家常便飯的機會。成日出街食飯已經唔知食乜好，而且食親都係覺得自己煮得好食啲，放假有時間都係親自下廚整番兩味吧！今日忽然好想食富臨個粉絲蝦煲，於是即興搞咗哩煲嘢出嚟，好香好惹味感覺似炒米粉，我同阿媽兩個人當一餐晚飯，如果當餸食夠4人份量。

材料：

中蝦   半斤

節瓜   2個(細)

粉絲   1札

薑、蔥、蒜頭各少許

調味料：

雞粉、頭抽、糖、粟粉、胡椒粉、紹酒

做法：

1. 蝦剪去頭、腳，背脊剪一刀挑出蝦腸，洗淨吸乾水。

2. 粉絲用水浸軟。

3. 節瓜去皮切絲。

4. 預備砂煲，加油燒紅，爆香蒜片及薑片，加入節瓜絲炒勻，加少許雞粉調味。蓋上煲蓋煮約3分鐘將節瓜煮至半熟，開蓋炒至乾身，盛起備用。

5. 再次爆香蒜片及薑片，加入蝦大火煎熟。

6. 加入粉絲炒勻，頭抽、糖、粟粉、胡椒粉加少量水調成汁，加入煲內讓粉絲充分吸味，再加入之前已煮熟的節瓜，一直炒至乾水。

7. 最後加蔥略炒，再加入紹酒調味，即可原煲上枱。

PS. 今次用咗屋企剩餘的惠康牌龍口粉絲，感覺麻麻地，太軟一炒好易斷，煮哩個煲應該用隻彈牙爽口會好食啲，有咩牌子好食介紹吓俾我知~