香草忌廉雞粒意大利飯

睇番上一篇文章先發覺自己原來已經大半年冇入過廚房，趁今日母親節特登煮個靚飯同阿媽撐枱腳。平時阿媽餐餐都係中式小菜，今日攪吓新意思煮我最鍾意嘅Risotto，簡單好睇又好食，之前幾次都係整西班牙海鮮飯（咿乜原來我仲未post過出嚟...)，阿媽都冇份食，今次試新口味等佢做第一個食客！

材料：(4人份量)
意大利米   500g
白酒   250ml
清雞湯   400ml
忌廉   200ml
雞扒   1塊
洋蔥   半個
甘筍   1條
蘆筍   半包
大啡菇   1個 (可用其他蘑菇)
香草 (Basil & Oregano)
橄欖油

做法：
1. 雞扒解凍、去皮、切粒，用鼓油、糖、胡椒粉、粟粉、香草、橄欖油醃半小時。
2. 蔬菜全部洗淨切粒。
3. 用平底有蓋較深的鑊，大火放數湯匙橄欖油加熱，油多一點無所謂，米很吸油。意大利米不用洗要乾身，放進熱鑊炒勻至油全吸收，加入白酒炒至乾水。
4. 加入蔬菜粒和雞粒炒勻，加入一半雞湯，蓋上鑊蓋，收至中火煮5-8分鐘，留意不能乾水，如水太快乾掉可再加雞湯，待米煮成半熟，看到米粒外層變透明中間還有點白色就可以了。
5. 將材料再次炒勻，加入忌廉和餘下的雞湯，再蓋上鑊蓋煮約10分鐘直至米粒看不見中間有白色，如水份不夠可多加一點雞湯或清水，喜歡creamy及軟身的可多一點水，喜歡吃飯焦的可稍為煮長時間一點。

意式煎釀蘑菇

時間過得實在太快，原來已經咁耐冇寫blog，上次招呼朋友嚟食飯已經係8月的事，差啲已經唔記得自己煮咗啲乜。大伙兒聚餐，最好煮啲簡單快捷又受歡迎的菜式，釀蘑菇由三歲到八十歲都啱食， 個個都讚好味，而且一定唔會食剩，非常適合大食會。

材料：
啡蘑菇 2盒 (約30粒)
洋蔥半個
免治牛肉250克
Parmesan 芝士碎少量
番茜(parsley)及羅勒(basil)少許

做法：
1. 蘑菇去莖，洗淨，吸乾水備用。
2. 洋蔥切碎，落鑊炒至軟身。
3. 牛肉加少量糖、胡椒粉、生粉、豉油調味。
4. 將牛肉、洋蔥、芝士及香草拌勻，釀入蘑菇內，輕輕壓實，再在肉面上拍上少許生粉。
5. 將平底鑊燒熱，加橄欖油，先用大火將釀好的蘑菇牛肉一面煎香，再用中火把蘑菇一面慢慢煎熟。煎的時候會出水，把它煎至乾身，上碟。
6. 喜歡醬汁的，可選超市能買到的牛扒汁，加熱淋面，或可直接配茄汁或芥末，隨個人喜好。

此菜式亦可用白蘑菇或豬肉替代。配pasta sauce及意粉也很適合。

Liza's Kitchen Photo Gallery

吉列蠔

鍾意食蠔，除咗生蠔之外第二最愛就係吉列，皮脆裡面creamy，正！出街食次次都係一人得一兩隻，絕對唔夠喉，自己炸鍾意食幾多都得，用廣島蠔就最啱，size good fit，夠甜而且唔膩，諗起都流晒口水。

材料：
急凍廣島蠔   [$128, from Yata]
小麥粉 (或粟粉)
雞蛋1隻
麵包糠   [$21.50, from Yata]

做法：
1. 蠔放入微波爐解凍，然後洗淨澀乾水。
2. 雞蛋打勻。
3. 將麵包糠倒入碟內。
4. 將蠔薄薄拍上小麥粉，再沾蛋液，然後放到麵包糠上沾滿。
5. 鑊內加油預熱，建議用粟米油，芥花籽油同橄欖油絕對唔適合用嚟炸嘢。
6. 試油溫可放一點麵包糠進油鑊，見有氣泡出現代表夠熱。
7. 將蠔放入油鑊炸至兩面金黃色即可撈起。
8. 食的時候加檸檬汁及他他醬最好味。

廣島蠔,
1kg 大概有40幾隻

軟麵包糠

他他醬

海膽玉子燒

升級版玉子燒，加入海膽更鮮甜，食到停唔到口。唔好睇小玉子燒只係煎雞蛋咁簡單，其實都要幾多心機先整得靚，出去食日本料理幾十蚊一份我覺得絕對唔係收多你，自己整都幾好玩，鍾意食嘅不妨試吓。

材料：
雞蛋     3隻
海膽     半板
雞湯     4湯匙
豉油     1湯匙
米酒     1湯匙
糖        3茶匙

另外要預備玉子燒專用方形煎pan，吉之島有得賣，$39.90，但注意只可用於明火，不可在電磁爐使用。


做法：
1. 雞蛋打勻，鍾意有口感啲可以留番部份蛋白唔好打散。
2. 用另一個碗將雞湯、豉油、米酒和糖攪勻，直至糖完全溶化。
3. 將調味料加入蛋漿中攪勻。
4. 煎pan預熱，用廚房紙沾食油塗抹整個pan內，改用慢火。
5. 將1/3蛋液注入pan，待煎至七分熟時，在近前端的位置鋪上海膽。

6. 用鑊剷和筷子小心地將蛋皮從前端開始捲起，海膽捲在中間。
7. 捲好後把整條蛋捲推到pan的最前端，然後再用廚房紙沾食油塗抹整個pan內。
Tips: 如果不太熟手可將煎pan離火慢慢捲，捲好再放回爐上繼續加熱。

8. 將另外1/3蛋液注入，輕輕把蛋捲提起一點讓蛋液流入底下。

9. 煎至七分熟時，再將蛋捲從前端往後捲。
10. 重覆步驟7至9。
11. 如想把蛋捲造型，可趁熱及裡面還沒完全熟透時，移到錫紙上壓成所需形狀。

12. 涼一點後可上碟切開。

皇帝蟹

皇帝蟹買番嚟已經係即食，其實唔駛煮，一大班朋友食飯整一隻，見到都開心，成餐飯變得好有睇頭，一人一隻蟹腳好滿足。行咗幾間超級市場，都有即食蟹賣，吉之島有鱈場蟹，比較細隻少少，啲腳短啲；citysuper賣松葉蟹，啲腳好長好幼，個身冇咩好食；最後去一田，見到隻皇帝蟹，實在太吸引喇，即時雙眼發光，衝過去買一隻！皇帝蟹多肉多膏，身同腳都好好味，賣相又勁，抵讚！食之前放入微波爐解凍1個鐘頭就ok。

原隻北海道熟皇帝蟹 (乸)   [$338 from Yata]

專人服侍拆蟹

京蔥黑豚肉煮

想搵機會煮黑豚肉好耐喇，睇電視介紹睇得多，第一次試整，相當唔錯，買到靚肉點整都好味，買餸錢真係唔慳得，順手拈來一棵大葱炒埋一碟，小學生level嘅難度，大廚級嘅滋味，招呼朋友一定唔會失禮。

材料 (8人份)：
日本極上黑豚肉 (薄片)　　約250g   (from citysuper, $106)
日本大葱     2棵   (from Yata, $23)
麵豉醬     2湯匙

做法：
1. 黑豚肉加糖、生粉、生抽、麵豉醬及油醃10分鐘。
2. 大葱洗淨切小段。
3. 大火起鑊加油，放入大葱炒，加入 2湯匙清水蓋上煮約2-3分鐘至軟身。
4. 將大葱撥到鑊的一邊，空出位置放入黑豚肉炒熟，再將兩種材料炒勻。
5. 加糖、鹽，再加 2湯匙米酒及少許麻油調味即成。

麵豉醬, 哩隻比較淡口