2011年11月11日星期五

意式煎釀蘑菇

時間過得實在太快,原來已經咁耐冇寫blog,上次招呼朋友嚟食飯已經係8月的事,差啲已經唔記得自己煮咗啲乜。大伙兒聚餐,最好煮啲簡單快捷又受歡迎的菜式,釀蘑菇由三歲到八十歲都啱食, 個個都讚好味,而且一定唔會食剩,非常適合大食會。

材料:
啡蘑菇 2盒 (約30粒)
洋蔥半個
免治牛肉250克
Parmesan 芝士碎少量
番茜(parsley)及羅勒(basil)少許




做法:
1. 蘑菇去莖,洗淨,吸乾水備用。
2. 洋蔥切碎,落鑊炒至軟身。
3. 牛肉加少量糖、胡椒粉、生粉、豉油調味。
4. 將牛肉、洋蔥、芝士及香草拌勻,釀入蘑菇內,輕輕壓實,再在肉面上拍上少許生粉。
5. 將平底鑊燒熱,加橄欖油,先用大火將釀好的蘑菇牛肉一面煎香,再用中火把蘑菇一面慢慢煎熟。煎的時候會出水,把它煎至乾身,上碟。
6. 喜歡醬汁的,可選超市能買到的牛扒汁,加熱淋面,或可直接配茄汁或芥末,隨個人喜好。

此菜式亦可用白蘑菇或豬肉替代。配pasta sauce及意粉也很適合。






2010年12月7日星期二

吉列蠔

鍾意食蠔,除咗生蠔之外第二最愛就係吉列,皮脆裡面creamy,正!出街食次次都係一人得一兩隻,絕對唔夠喉,自己炸鍾意食幾多都得,用廣島蠔就最啱,size good fit,夠甜而且唔膩,諗起都流晒口水。

材料:
急凍廣島蠔   [$128, from Yata]
小麥粉 (或粟粉)
雞蛋1隻
麵包糠   [$21.50, from Yata]




做法:
1. 蠔放入微波爐解凍,然後洗淨澀乾水。
2. 雞蛋打勻。
3. 將麵包糠倒入碟內。
4. 將蠔薄薄拍上小麥粉,再沾蛋液,然後放到麵包糠上沾滿。
5. 鑊內加油預熱,建議用粟米油,芥花籽油同橄欖油絕對唔適合用嚟炸嘢。
6. 試油溫可放一點麵包糠進油鑊,見有氣泡出現代表夠熱。
7. 將蠔放入油鑊炸至兩面金黃色即可撈起。
8. 食的時候加檸檬汁及他他醬最好味。

廣島蠔,
1kg 大概有40幾隻

軟麵包糠

他他醬

2010年12月5日星期日

海膽玉子燒

升級版玉子燒,加入海膽更鮮甜,食到停唔到口。唔好睇小玉子燒只係煎雞蛋咁簡單,其實都要幾多心機先整得靚,出去食日本料理幾十蚊一份我覺得絕對唔係收多你,自己整都幾好玩,鍾意食嘅不妨試吓。

材料:
雞蛋     3隻
海膽     半板
雞湯     4湯匙
豉油     1湯匙
米酒     1湯匙
糖        3茶匙



另外要預備玉子燒專用方形煎pan,吉之島有得賣,$39.90,但注意只可用於明火,不可在電磁爐使用。


做法:
1. 雞蛋打勻,鍾意有口感啲可以留番部份蛋白唔好打散。
2. 用另一個碗將雞湯、豉油、米酒和糖攪勻,直至糖完全溶化。
3. 將調味料加入蛋漿中攪勻。
4. 煎pan預熱,用廚房紙沾食油塗抹整個pan內,改用慢火。
5. 將1/3蛋液注入pan,待煎至七分熟時,在近前端的位置鋪上海膽。
6. 用鑊剷和筷子小心地將蛋皮從前端開始捲起,海膽捲在中間。
7. 捲好後把整條蛋捲推到pan的最前端,然後再用廚房紙沾食油塗抹整個pan內。
Tips: 如果不太熟手可將煎pan離火慢慢捲,捲好再放回爐上繼續加熱。
8. 將另外1/3蛋液注入,輕輕把蛋捲提起一點讓蛋液流入底下。
9. 煎至七分熟時,再將蛋捲從前端往後捲。
10. 重覆步驟7至9。
11. 如想把蛋捲造型,可趁熱及裡面還沒完全熟透時,移到錫紙上壓成所需形狀。
12. 涼一點後可上碟切開。

2010年12月3日星期五

皇帝蟹


皇帝蟹買番嚟已經係即食,其實唔駛煮,一大班朋友食飯整一隻,見到都開心,成餐飯變得好有睇頭,一人一隻蟹腳好滿足。行咗幾間超級市場,都有即食蟹賣,吉之島有鱈場蟹,比較細隻少少,啲腳短啲;citysuper賣松葉蟹,啲腳好長好幼,個身冇咩好食;最後去一田,見到隻皇帝蟹,實在太吸引喇,即時雙眼發光,衝過去買一隻!皇帝蟹多肉多膏,身同腳都好好味,賣相又勁,抵讚!食之前放入微波爐解凍1個鐘頭就ok。

原隻北海道熟皇帝蟹 (乸)   [$338 from Yata]


專人服侍拆蟹

2010年12月2日星期四

京蔥黑豚肉煮

想搵機會煮黑豚肉好耐喇,睇電視介紹睇得多,第一次試整,相當唔錯,買到靚肉點整都好味,買餸錢真係唔慳得,順手拈來一棵大葱炒埋一碟,小學生level嘅難度,大廚級嘅滋味,招呼朋友一定唔會失禮。

材料 (8人份):
日本極上黑豚肉 (薄片)  約250g   (from citysuper, $106)
日本大葱     2棵   (from Yata, $23)
麵豉醬     2湯匙






做法:
1. 黑豚肉加糖、生粉、生抽、麵豉醬及油醃10分鐘。
2. 大葱洗淨切小段。
3. 大火起鑊加油,放入大葱炒,加入 2湯匙清水蓋上煮約2-3分鐘至軟身。
4. 將大葱撥到鑊的一邊,空出位置放入黑豚肉炒熟,再將兩種材料炒勻。
5. 加糖、鹽,再加 2湯匙米酒及少許麻油調味即成。
麵豉醬, 哩隻比較淡口

2010年11月6日星期六

蘆筍牛肉卷

平時去食日本料理,通常會有金菇牛肉卷,但我覺得金菇太韌,今次改用蘆筍,食落爽口啲,而且有青青綠綠的顏色,賣相更加吸引。


材料 (8人份):
美國肥牛   600g
泰國蘆筍(幼身)   1包
日本烤肉醬汁(甘口)    1枝


做法:
1. 肥牛加少許糖、胡椒粉、生抽、生粉醃10分鐘。
2. 蘆筍用滾水灼2-3分鐘至半熟,放涼澀乾水,切成一開三的長度。
3. 將肥牛一片片攤開,捲入蘆筍。
4. 平底鑊加油燒熱,放入牛肉卷煎熟,見牛肉剛熟就可上碟,過火牛肉會老。
5. 全部煎好上碟後,將鑊內剩餘的油倒走,加入烤肉醬汁煮滾,淋上牛肉卷即成。
日本烤肉醬汁(甘口)