淳薑合桃蛋糕~~芬芳摸鼻鮮薑香氣，微辣滿滿溫暖感！

Zaza 一直都非常鍾愛鮮薑嘅香味，無論炒菜煲湯都好鍾意落薑，但係有啲食物如果放薑又唔係好match，薑嘅辣味會蓋過咗食物本身味道，尤其是甜點，太辣唔係人人接受到。於是，我等登訂咗隻食用微辣食用薑油返嚟，就係為咗整哩個蛋糕！用蒸餾而成嘅鮮薑油所含嘅辣椒素非常少，因此食落唔會覺得辣，但係就充滿清新嘅鮮薑味，用嚟整甜品啱晒！

材料：

牛油       110 g

黃糖       200 g

自發粉   300 g

泡打粉   1茶匙

淳薑有機蒸餾鮮薑油   40滴

雞蛋       3隻

清水       180 ml

合桃肉   120 g

做法：

1. 先將合桃肉放入密實袋，用木棒敲碎。
   
   
   
   
2. 焗爐預熱至180 C。
   
   
   
3. 將牛油及黃糖放入大碗中拌勻。
   
   
   
   
   
   
4. 自發粉及泡打粉過篩，一邊逐少加入碗中，一邊攪拌。
   
   
   
5. 加入薑油並拌勻。
   
   
   
   
   
   
6. 逐一加入雞蛋並拌勻。
   
   
   
   
   
7. 加入清水並拌勻。
   
   
   
   
   
8. 加入一半合桃碎拌勻。
   
   
   
   
   
9. 在蛋糕盤上抹上一層食油。
   
   
   
   
   
10. 將材料倒入蛋糕盤中，並灑上餘下的合桃碎。
    
    
    
    
    
11. 放進焗爐中，先用上下火焗20分鐘，再轉用下火焗10分鐘。
    
    
    
    

蜂蜜玫瑰水晶果凍

農曆新年幾日假期，整咗好多糕點，加埋就快情人節， 一於搞搞新意思整個又浪漫又養顏嘅甜品，祝大家新一年花開富貴，甜甜蜜蜜！粉紅玫瑰花嘅味道同蜜糖好夾，沖花茶時都可以加入蜜糖飲用。

材料：
清水   1000ml
粉紅玫瑰花   10g
冰糖   50g
蜂蜜   50g
大菜絲   10g

做法：

1. 煲滾1000ml清水，收最慢火，放入玫瑰花煮10分鐘。

2. 隔走煮過的玫瑰花，加入冰糖煮溶。
3. 加入大菜絲煮溶。

4. 熄火，加入蜂蜜攪勻，稍為放涼。
5. 將材料注入蛋糕模內，再灑入乾玫瑰花碎。 

6. 待半凝固時，用筷子將材料攪勻令玫瑰花均勻分佈在果凍中。
7. 放入雪櫃冷凍1小時，待完全凝固後脫模取出果凍。

帶子蘆筍意大利飯(✿◠‿◠) ❤Creamy & Yummy❤

好耐冇煮意大利飯，見上次煮青口剩咗半支白酒，今日用咗佢先！前年母親節又係煮意大利飯，事隔兩年今次整個升級版先得！原本想用黑松露但係買唔到，不過就咁都一樣好好味！改咗上次的食譜，用多咗白酒少啲雞湯，同埋轉用低脂忌廉，做出嚟冇咁Heavy，而且多啲蔬菜食落更Fresh！


材料：
意大利米   2杯
白酒   400ml
清雞湯   250ml
低脂忌廉   200ml
帶子   6隻
幼蘆筍   1包
紫洋蔥   1個
啡蘑菇   4粒
香草 (Pasley)
橄欖油

做法：
1. 帶子解凍、吸乾水，灑上鹽、胡椒粉、粟粉調味。
2. 蔬菜全部洗淨切粒，蘆筍留少量原條不用切。

3. 用平底鑊加橄欖油大火煎香帶子兩面，至五成熟，加入少量牛油煎至乾身。
4. 原條的蘆筍放到平底鑊略煎1-2分鐘。

5. 用另一有蓋較深的鑊，大火放數湯匙橄欖油加熱炒米，油多一點無所謂，米很吸油。意大利米不用洗要乾身，放進熱鑊炒勻至油全吸收，加入白酒炒勻。
6. 加入蔬菜粒炒勻，加入雞湯，蓋上鑊蓋，收至中慢火煮8-10分鐘，留意不能乾水及黏底，如水太快乾掉可再加雞湯或清水，待米煮成半熟，看到米粒外層變透明中間還有點白色就可以了。
7. 將材料再次炒勻，加入忌廉，並將煎過的帶子及蘆筍放在飯面，再蓋上鑊蓋煮約3-5分鐘直至米粒看不見中間有白色，如水份不夠可多加一點雞湯或清水，喜歡creamy及軟身的可多一點水，喜歡吃飯焦的可稍為煮長時間一點。
8. 上碟後灑上香草點綴及調味。

花彫醉鮑魚~吃了令人回味

 前陣子看到網友們不停post這道菜，非常吸引，這個星期招呼朋友來我家作客，第一時間想到要弄來試試，鮮鮑魚仔也不貴，$100有16隻，大伙人每人一口感覺很滿足！原食譜已找不出來，自己自由發揮做了個新的，味道和賣相也相當不錯，鮮味十足而且很軟滑，大家不妨參考。

還記得幾年前在江蘇工作，很多時都在家煮飯，當地的朋友介紹Zaza試一種叫“糟油”的汁料，是當地特產的一種白滷水，顏色不像我們平常見的滷水那樣黑嗎嗎，而是淡黃色的，帶有淡淡的黃酒香，加上茴香、月桂等多種香料，味道不太濃但非常甘香鮮味，包裝並不像我們常見的玻璃樽裝，只用塑膠袋裝成一包包，那種樣子在香港一定遭人白眼，但吃過真的令人回味無窮，平常買一隻童子雞，蒸熟後放在小鍋內，加一包糟油浸一晚，其他什麼也不用加，就已經相當鮮甜嫩滑，味道也剛好不太鹹，公司的小妹子喜歡吃雞腳，泡一盤回去大伙吃得津津有味。

回來香港後一直想找這種汁料，但怎麼也找不著，看見網友介紹了古越龍山的香糟露，心想應該是類似的東西，買來一瓶試試，但感覺有點失望，味道很假，咀刁的Zaza對味精非常抗拒，這瓶汁料口感就是很重味精，雖然也有點香料和紹興酒的味道，但算不上突出，這次只加了一點點當調味。

花雕醉鮑魚做法：
1. 鮮鮑魚用刷在清水下徹底洗刷乾淨，Zaza刷了一個鐘頭。
2. 將鮑魚連殼蒸熟，約10分鐘。
3. 放涼後去殼及去除內臟 (綠色一塊的和腸臟)。
4. 放進小鍋或密封玻璃瓶內。
5. 圓肉和杞子各小量，洗淨後用半碗滾水泡成茶，加入一小塊冰糖，焗5分鐘。
6. 在杞子茶中加入一湯匙雞汁攪勻。
7. 將杞子茶倒進鮑魚的瓶子，再加入小量香糟露，最後注入花彫酒至完全浸泡所有鮑魚。
8. 放在雪櫃內浸一日一夜已經很入味了，適合當冷盤直接食用。

軟綿綿♡果子香♥鮮橙紅莓鬆餅

又係Zaza最鍾意食嘅鬆餅時間！上次試咗用酸忌廉整藍莓鬆餅，今次試吓用第二個食譜，做出嚟更鬆軟，味道較清淡，食多多都唔膩！ 

材料 (12個份量)：
低筋麵粉 2杯
梳打粉 1茶匙
鮮奶 150ml
黑糖 1/2杯
無鹽牛油 120克
蜜糖 3湯匙
雞蛋 2隻
鹽 1/2茶匙
橙 1個
紅莓 1/2杯
杏仁片小量





做法：
1. 先將橙榨汁，連汁連果肉備用，喜歡橙皮的話可把橙皮刨成幼絲。
2. 把牛油放在碗內隔水加熱煮溶。
3. 2隻雞蛋打勻。
4. 將所有液體材料混合：橙汁、牛油、蛋漿、蜜糖、鮮奶，再加入黑糖攪勻。
5. 低筋麵粉過篩放進大碗內，將(4)的液體材料逐少加入麵粉內，並一直攪拌至形成粉漿。
6. 加入梳打粉、鹽、紅莓碎、杏仁片攪勻。

7. 焗爐預熱至190℃，將粉漿放入蛋糕杯內至八成滿，放入焗爐焗20分鐘即可。
8. 出爐後盡快把鬆餅從蛋糕模拿出，以免水氣積聚。

外脆內鬆軟♡香噴噴♥藍莓鬆餅

美女廚神Zaza今日焗咗好睇又好食嘅藍莓鬆餅！賣相超吸引，食落外脆內鬆軟，實在太正喇！ヾ(*´∀｀*)ﾉ 想當年迷倒不少男生嘅Zaza muffins今日重現江湖，有人心動嗎？

簡化版食譜如下，有興趣請試試！

材料：
中筋麵粉１杯
低筋麵粉１杯
梳打粉１茶匙
鹽1/2茶匙
黑糖１杯
牛油80克
酸忌廉１盒(約230克)
雞蛋１隻
藍莓１杯
杏仁片小量

做法：
１ 麵粉混合，過篩，加入梳打粉、鹽、糖攪勻。
２ 打勻雞蛋加入麵粉中，攪勻。
３ 牛油煮溶，加入麵粉中，攪勻。
４ 酸忌廉逐少加入，攪勻，直至全部材料混合成糊狀。
５ 藍莓稍為用叉弄碎，加入麵糊中，再加入杏仁片攪勻。
６ 將麵糊放入有紙杯的蛋糕杯中。
７ 焗爐預熱至180℃，放入鬆餅焗25-30分鐘即可。

咖啡香 + 音韻悠揚 + 歡樂共聚，Latte Art 拉花初體驗

Zaza最鍾意飲咖啡，每日一杯，並非用來提神，而是打從心裡喜歡那種甘香醇厚的味道，品嚐一杯優質的咖啡就像品味人生一樣，淡淡的苦澀、甘甜、芳香、柔滑，營造出豐富的層次，是絕非其他飲品能帶出的感覺。數年前很喜歡到台北旅遊，差不多每年會去一次，最享受在悠閒的午後靜靜地坐在別緻的咖啡室裡看書，陶醉在咖啡香與書香之間，寫意非常。當時在台北的小街上到處都開著獨特的咖啡小店，每間都充滿著不同的個性，盡顯店主心思，而且客人都很優遊自在，完全能躲開鬧市的繁囂。Zaza曾經都很嚮往擁有一間自己的咖啡畫廊，可惜只能慨嘆香港是個過度商業化的城市，要經營一間只為夢想不為賺錢的咖啡室談何容易？香港的商店不也是全被連鎖集團壟斷了嗎？

直至前陣子認識了 Specialty Coffee Studio，一下子就被感動了！原來在香港也可以有如此個性化的咖啡店！小店內每件傢俬、每個擺設都是店主親手將舊物翻新，帶點Vintage感覺的空間別有一番情懷，是在任何一間連鎖咖啡店都找不著的人情味！店內平日招待客人品嚐咖啡茶點，週末舉辦各種興趣班，讓不同範疇的朋友聚聚腳。能遇上店主這樣難得的有心人，Zaza二話不說就提出跟他們合作辦個 Latte Art Blogger Event，好讓更多朋友認識這個特式的角落！

Specialty Coffee Studio 店內環境精緻，很有心思

雖然咖啡是飲得多，但親手做Latte拉花還真是第一次！家裡買了台咖啡機還未開封，希望學了拉花技巧日後能在家裡親自弄弄招呼朋友。今次活動請來了年紀輕輕但經驗豐富的導師Mandy講解及示範沖調咖啡和拉花的各個步驟，每個動作都很講究，也需要不少心機和技巧呢！

Zaza 親手泡製的 Latte，有人想試飲嗎？

各位Blogger完成了自己的作品後，都興奮非常，能夠親手拉出一杯Latte，滿足感真的難以形容！店主霖霖還特別為每位同學預備了精美的紀念狀，實在窩心，能夠在這次活動中認識一眾Blogger亦非常高興呢！

今次活動能夠順利完成，功不可沒的還要答謝我們的攝影師和作曲家Elton。愜意的環境又怎少得悅耳音樂相伴？美妙的樂曲確實能為平淡的空間增添不少氣氛！從前Zaza的音樂造詣很低，最懂的只限於karaoke，但自從接觸了Elton的意境音樂後，對音樂的體會真的廣闊了很多。擺脫了流行曲歌詞的牽引和煽情，在夜閑人靜時用心感受音符間流露的情感，就彷彿在聆聽心裡面的聲音，重溫自己的故事，素描出腦海內一幕幕的畫面。一段愉快的旋律能令人想起快樂的回憶，一首淒美的樂章又令人暗暗落淚，但每一種感動都是由心而發，沒有人能把你的感覺改寫。如果大家都想感受一下意境音樂帶來的心靈震撼，不妨到Elton的個人音樂網站 eltonchung.com 試聽他的樂曲，相信你也同樣會對音樂改觀！

Elton Chung Music 心意咭，動人樂章你會想送給誰？

日後Specialty Coffee Studio還會經常舉辦拉花班和其他興趣班，如果各位都想親身體驗，記得Like以下幾個Facebook專頁接收最新活動情報！經過今次活動後，Zaza發掘到Specialty Coffee Studio這個地方也非常適合用來舉辦DIY護膚品班呢！Zaza一直在物色好地點，現在終於找到了！相信很快我們就可以在這裡見面了，好期待！大家一定要密切留意啊！

愛美麗網： imbeauty.com.hk  Facebook: https://www.facebook.com/imbeautyhk
Specialty Coffee Studio: https://www.facebook.com/SCCA.HK
Elton Chung Music: eltonchung.com  Facebook: https://www.facebook.com/eltonchungmusic
更多活動照片請按這裡

去水腫美白薏米桂圓茶

前陣子天氣潮濕悶熱，加上Zaza勁忙兼夜睡早起，搞到個人好攰，塊面勁水腫，脷腫同兩邊好深牙齒印，中醫角度代表個人好”濕”，即係淋巴系統唔暢通，循環唔好新陳代謝慢，令水份同毒素積聚喺身體入面唔能夠排出。於是Zaza就連續幾晚煲薏米水飲，三四日後就好番好多喇！面上的浮腫退咗，個人都精神番。

做法好簡單，又好飲，可以當糖水，薏米有效利尿去水腫，仲可以美白皮膚，桂圓補血安神又養顏，蜜棗補氣活血，實在係女仕恩物啊！

材料：

生薏米　（細粒）

熟薏米　（大粒）

蜜棗

桂圓　（龍眼肉）

冰糖

（份量多少冇所謂，生熟薏米比例各一半，如圖中份量約可煲成2-3杯，如果體質屬寒底或冬天時飲用可加一片薑。）

做法：

1. 生、熟薏米沖洗後用水浸泡1-2小時。

2. 蜜棗及桂圓沖洗乾淨。

3. 煮滾6碗水，加入生、熟薏米、蜜棗及桂圓，用中火煲約1小時至薏米煲焾。

4. 如喜歡甜的可加入一小塊冰糖，否則不加也略帶微甜。冰糖全溶化後攪勻即可。

南瓜火腩煲

每逢過年過節，總係有大量雞呀、燒肉呀、燒鵝呀，食都食到怕，隔咗夜又唔好食，而且全部都係肉真係唔多健康。唔想浪費，兼想好味指數同健康指數直線上升，可以試吓配啲蔬菜煮個靚餸，實行活化哩啲無人問津嘅食材。今次將阿媽拜完神嗰斤燒肉炆咗南瓜火腩煲，香噴噴熱辣辣，一個餸兩個人食差不多吃光光，真係正！

材料：

燒肉　一斤

洋葱　一個

南瓜　約1/4個

磨豉醬　一湯匙

薑、蒜頭、乾葱頭各數片

葱、蒜、芫茜、唐芹各一條隨喜好加入

做法：

1. 燒肉原條起骨，肉切件。

2. 洋葱及南瓜洗淨切件。

3. 大火燒紅砂煲，加入少許油爆香薑、蒜頭及乾葱，再加入洋葱炒香。

4. 加入南瓜略炒，再加入燒肉炒勻。

5. 備一碗熱水，加入一大湯匙磨豉醬攪勻，注入砂煲內，蓋好收至中火，炆10分鐘，間中攪拌。

6. 隨喜好加入葱、蒜、芫茜或唐芹，蓋上熄火，焗3分鐘，可原煲上桌。

P.S. 由於燒肉已經有味，炆嘅時候南瓜會吸晒啲肉味同磨豉汁，夠晒味唔須要再加其他調味料。鍾意香口可多放乾葱。

節瓜粉絲蝦煲

睇番舊文，先發覺我冇post過啲家常小菜出嚟，之前工人喺度嗰陣都係佢煮飯，雖然煮得唔好食，但為咗唔同佢爭嘢做我都係尤得佢煮，所以甚少有煮家常便飯的機會。成日出街食飯已經唔知食乜好，而且食親都係覺得自己煮得好食啲，放假有時間都係親自下廚整番兩味吧！今日忽然好想食富臨個粉絲蝦煲，於是即興搞咗哩煲嘢出嚟，好香好惹味感覺似炒米粉，我同阿媽兩個人當一餐晚飯，如果當餸食夠4人份量。

材料：

中蝦   半斤

節瓜   2個(細)

粉絲   1札

薑、蔥、蒜頭各少許

調味料：

雞粉、頭抽、糖、粟粉、胡椒粉、紹酒

做法：

1. 蝦剪去頭、腳，背脊剪一刀挑出蝦腸，洗淨吸乾水。

2. 粉絲用水浸軟。

3. 節瓜去皮切絲。

4. 預備砂煲，加油燒紅，爆香蒜片及薑片，加入節瓜絲炒勻，加少許雞粉調味。蓋上煲蓋煮約3分鐘將節瓜煮至半熟，開蓋炒至乾身，盛起備用。

5. 再次爆香蒜片及薑片，加入蝦大火煎熟。

6. 加入粉絲炒勻，頭抽、糖、粟粉、胡椒粉加少量水調成汁，加入煲內讓粉絲充分吸味，再加入之前已煮熟的節瓜，一直炒至乾水。

7. 最後加蔥略炒，再加入紹酒調味，即可原煲上枱。

PS. 今次用咗屋企剩餘的惠康牌龍口粉絲，感覺麻麻地，太軟一炒好易斷，煮哩個煲應該用隻彈牙爽口會好食啲，有咩牌子好食介紹吓俾我知~

香草薯仔粒

由細到大都好鍾意食薯仔，不論薯條薯角定焗薯都係我至愛。但屋企冇焗爐，又唔想炸嘢，仲可以點整？哩個香草薯仔粒就啱晒！當餸又得，小食又得，用嚟做愛心牛扒嘅伴碟就最得！俾小朋友食點都好過食麥當當薯條！我最鍾意點英式芥辣，或者點茄汁都好好味。

材料：
新薯 (即細細粒的薯仔，唔知點解今日街市咁平，$3一大袋，即刻買嚟食。注意最好唔好買帶有青色的，會有瀝味。)
橄欖油
香草、鹽、黑椒

做法：
1. 薯仔洗淨，用刷擦乾淨表皮的泥，因連皮食用，必須乾淨。用廚房紙吸乾水份。
2. 平底煎pan，加兩湯匙橄欖油預熱。薯仔很吸油，油多一點沒關係，否則不香。
3. 原粒薯仔落鑊，大火煎至表皮金黃色。
4. 將薯仔切成一半，或1/4，會看到薯仔中心一圈還是生的，收慢火煎。
5. 隨喜好加入調味料，香草、鹽、黑椒碎各適量炒勻。
6. 視乎薯仔大小，約須煎15-20分鐘才全熟，要有耐性啊！

PS. 同樣整法煎蕃茄都好好味呀！

香草忌廉雞粒意大利飯

睇番上一篇文章先發覺自己原來已經大半年冇入過廚房，趁今日母親節特登煮個靚飯同阿媽撐枱腳。平時阿媽餐餐都係中式小菜，今日攪吓新意思煮我最鍾意嘅Risotto，簡單好睇又好食，之前幾次都係整西班牙海鮮飯（咿乜原來我仲未post過出嚟...)，阿媽都冇份食，今次試新口味等佢做第一個食客！

材料：(4人份量)
意大利米   500g
白酒   250ml
清雞湯   400ml
忌廉   200ml
雞扒   1塊
洋蔥   半個
甘筍   1條
蘆筍   半包
大啡菇   1個 (可用其他蘑菇)
香草 (Basil & Oregano)
橄欖油

做法：
1. 雞扒解凍、去皮、切粒，用鼓油、糖、胡椒粉、粟粉、香草、橄欖油醃半小時。
2. 蔬菜全部洗淨切粒。
3. 用平底有蓋較深的鑊，大火放數湯匙橄欖油加熱，油多一點無所謂，米很吸油。意大利米不用洗要乾身，放進熱鑊炒勻至油全吸收，加入白酒炒至乾水。
4. 加入蔬菜粒和雞粒炒勻，加入一半雞湯，蓋上鑊蓋，收至中火煮5-8分鐘，留意不能乾水，如水太快乾掉可再加雞湯，待米煮成半熟，看到米粒外層變透明中間還有點白色就可以了。
5. 將材料再次炒勻，加入忌廉和餘下的雞湯，再蓋上鑊蓋煮約10分鐘直至米粒看不見中間有白色，如水份不夠可多加一點雞湯或清水，喜歡creamy及軟身的可多一點水，喜歡吃飯焦的可稍為煮長時間一點。